Молитва преподобному Сергию Радонежскому

   "О, священная главо, преподобие и богоносне отче наш Сергие, молитвою твоею, и верою, и любовию, яже к Богу, и чистотою сердца, еще на земле во обитель Пресвятыя Троицы душу твою устроивши, и ангельского общения и Пресвятые Богородицы посещения сподобившийся, и дар чудодейственныя благодати приемый, по отшествии же твоем от земных наипаче к Богу приближивыйся и небесныя силы приобщивыйся, но и от нас духом любве твоея не отступивый, и честныя твоя мощи, яко сосуд благодати полный и преизливающийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующия и к тебе c любовию притекающия. Испроси нам от Великодаровитаго Бога нашего всякий дар, всем и кое-муждо благопотребен: веры непорочны соблюдение, градов наших утверждение, мира умирение, от глада и пагубы избавление, от нашествия иноплеменных сохранение, скорбящим утешение, недугующим исцеление, падшим возставление, заблуждающим на путь истины и спасения возвращение, подвизающимся укрепление, благоделающим в делах благих преспеяние и благословение, младенцем воспитание, юным наставление, неведущим вразумление, сиротам и вдовицам заступление, отходящим блаженное упокоение, и вся ны споспешествующими твоими молитвами сподоби в день страшного суда шуия части избавитися, десныя же страны общники быти и блаженный оный глас Владыки Христа услышати: Приидите, благословении Отца Моего, наследуйте уготованное вам Царство от сложения мира. Аминь".
 
« Молитвы о покровительстве семейному очагу   Молитвы о помощи в нужде, а также о заступничестве вдов и сирот »

Календарь

Иконы